Concept

…i’ay recueilly vn nombre des conceptions que i’ay sçeu cognoistre les plus doctes, plus mignõnes & plus propres pour mettre soubs tous genres de discours, aussi toutes manieres de parler ou d’escrire familierement & mesme les plus briefues: estimant qu’en la qualité &non en la quãtité de paroles, & du sens, consiste la subtilité d’vn beau mot & d’vn beau passage, & que d’iceluy en quelque deuis que ce puisse estre, ou escriture, nous puissions receuoir quelque lumiere d’inuention, & l’ornement qu’apportent les elocutions qui contiennent de beaux nombres, de belles figures, metaphores, similitudes, sentences, authorités & exemples, ainsi que font celles-cy, lesquelles i’ay mis aux fins que i’ay dict cy dessus: & pour se seruir du peu & du beaucoup, selon qu’il nous sera plus aisé & commode, soit à escrire ou à parler, & non pas afin qu’vn discours de paroles & lettres doiuent estre toutes tissuës & remplies de tous ces lieux communs. Car ce seroit vne chose assez mal ajancee: ains en celles dont nous nous voudrons servir, nostre iugement deura suppleer à leur deffaut, comme si quelque parole n’estoit si bien appropriee en son lieu, ainsi qu’il seroit requis, la changer: estant plus necessaire d’accommoder vne seule parole à tout vn sens, que nõ pas vn sens entier à vne simple parole, laquelle pour auoir esté par moy reduicte en fort peu de lieu, sans pource corrompre ny gaster le sens entier, me deura estre pardonné par ces raisons & plusieurs autres que ie laisse à considerer à un sage lecteur.     LES CONCEPTIONS TRES - EXCELLENTES ET DIVINES DE HIEROSME GARIMBERT, Paris, L’Angelier, 1585.